Huelt Plaz „um Canapé mat der woxx“: Am November sinn d’Kënschtler*innen Charlotte Muniken an Karma Catena (C’est Karma) op Besuch. Zesummen hunn si beim neie Magasinn vu Rosa Lëtzebuerg, queer.lu, matgewierkt. Mä wat bedeit et eigentlech, wa queer Kënschtler*innen openeentreffen? An wou geschitt dat iwwerhaapt?
COPYRIGHT: Isabel Spigarelli/WOXX
Zwou Kënschtler*innen, zwou Disziplinnen: Wärend d’Karma Catena virun allem an der Musek doheem ass, ass d’Zeechnen dem Charlotte Muniken seng Welt. Fir de neie Magasinn queer.lu vu Rosa Lëtzebuerg, deen am Januar 2024 lancéiert gëtt, hunn déi zwee sech zesumme gedoen. Am Magasinn gëtt et eng Illustratioun vum Charlotte ze entdecken, déi sech un engem Lidd vum Karma inspiréiert. Am Podcast verzielen si net nëmme, wéi dëse Projet gelaf ass, mä och wou si sech als queer Kënschtler*innen doheem fillen; wat Krisesituatioune mat der queer Community ze dinn hunn a wien hir queer Virbiller sinn. Dobäi schwéngt ëmmer rëm d’Fro mat: Wat heescht et, wa queer Kënschtler*innen openeentreffen? A wat kënnt dobäi eraus? Lauschtert eran an diskutéiert mat!
De Podcast abonnéieren: mat Apple Podcasts (iTunes) / op Spotify / mat Android. Opgronn vun technesche Problemer ass dësen Episod bis op weideres just op eisem Site ze fannen.
Dësen Episod ass an Zesummenaarbecht mat queer.lu entstanen.