Wéi all Woch bidd d’woxx iech an hirem Podcast een Abléck an hir journalistesch Aarbecht a beliicht d’Hannergrënn vun engem Artikel.
Nieft engem Iwwerbléck iwwert woxx vun dëser Woch schwätzen De Luc Caregari an de Joël Adami dës Woch iwwert de Problem vun der Plastikverschmotzung, virun allem an de Mierer. Diskutéiert gëtt d’EU-Verbuet vum Einwegplastik am Kontext vum globale Plastik-Problem. Si ginn net nëmmen dorobber an, ob et sënnvoll ass, Stréihällem ze verbidden, mä och op de Problem vum Mikroplastik. An dem Kontext beliichten si dann och synthetesch Faseren, den Abrieb vun de Pneuen an aner Facteuren, déi zu Mikroplastik feieren.
Een Aspekt, dee mam Plastikverbued ze dinn huet, ass China. Dat asiatescht Land huet bis Ufank vun dësem Joer ganz vill Plastik aus der EU an den USA recycléiert. Elo ass dat net méi de Fall. Dofir diskutéiert d’woxx d’Fro, ob et net vläicht och un dëser Entscheedung geleeën huet, datt d’EU elo relativ séier een dach ambitionéierte Gesetzesprojet op d’Been gestallt huet.