Jean Schoos: Operatioun Meedag

De véierte Fall vum Kapitän Fischbach féiert hien direkt an d’Entwécklungsgeschicht vun de spéidere Bommeleeër – eng Nebuléis aus korrupte SREL-Agenten, deier Immobiliëprojeten an den net sou proppere Saachen déi op der Stater Gare passéieren.

(©Binsfeld)

Fir de Fischbach fänkt dës Episode nawell ustrengend un: Den éischte Mee sollen Terroristen aus Däitschland op der Gewerkschaftsdemonstratioun op der Escher Brillplaz zouschloen, a kuerz virdru kënnt et nach zu enger bluddeger Geiselnam am Bettenger Klouschter. Hien muss also improviséieren, fir dat alles ze meeschteren, an d’Hëllef vum Armand Reisen, engem SREL-Agent deem hien net traut, unhuelen. Dat ass effektiv e saueren Apel, mä et gëtt nach méi komplizéiert – déi zwee Fäll sinn nämlech op eng onheemlech Manéier matenee verbonnen.

Unhand vun den Zoustänn an opgrond vun der ongesonder Konkurrenzsituatioun tëscht Gendarmerie a Police déi Ënn de 1970er virgeherrscht hunn, geléngt et dem Jean Schoos nees eng Kéier déi verstoppte Geschicht vun deene Joren erfuerbar ze maachen. Et geet drëms ze verstoen, wéi Lëtzebuerg do stoung, déi kleng Grimmel Land matzen an Europa a matzen am Kale Krich – deemools nach ouni d’Finanzplaz. Dat éiert och déi ganz Serie déi sech den Auteur virgeholl huet.

Leider mangelt et bei dëser Episod awer um formelle Plang. Den Ufank an den Enn vum Buch sinn effektiv spannend geschriwwen, d’Ereegnesser iwwerschloen sech richteg – mä an der Mëtt vum Buch kann et der Lieserin an dem Lieser mol ferm latzeg ginn. Ze vill Reunioune gi beschriwwen, ze vill verschidde Charaktere ginn agefouert, sou dass een zimmlech séier duerchernee kënnt. Do hëlleft och de Glossaire vun de Personnagen hannen am Buch net vill: De Fakt, dass den Auteur bal op all physesch Deskriptioun vu senge Charaktere verzicht, mécht et schwéier den Iwwerbléck ze halen. Wann dann nach laang Dialogen derbäi kommen, déi eigentlech net wierklech zur Handlung bäidroen, dann ass de Risiko d’Buch op d’Säit ze leeë grouss. An dat ass Schued, well – wéi gesot – um Schluss knuppt et nach mol sou richteg, an och de Kapitän Fischbach kënnt net sou aus dem Buch eraus, wéi en era gaangen ass. An deem Sënn lount sech d’Lektür vun „Operatioun Meedag“ sécher, a sief et nëmme fir sech fir dat nächst Buch waarm ze maachen.

Bei Editions Binsfeld.

 


Cet article vous a plu ?
Nous offrons gratuitement nos articles avec leur regard résolument écologique, féministe et progressif sur le monde. Sans pub ni offre premium ou paywall. Nous avons en effet la conviction que l’accès à l’information doit rester libre. Afin de pouvoir garantir qu’à l’avenir nos articles seront accessibles à quiconque s’y intéresse, nous avons besoin de votre soutien – à travers un abonnement ou un don : woxx.lu/support.

Hat Ihnen dieser Artikel gefallen?
Wir stellen unsere Artikel mit unserem einzigartigen, ökologischen, feministischen, gesellschaftskritischen und linkem Blick auf die Welt allen kostenlos zur Verfügung – ohne Werbung, ohne „Plus“-, „Premium“-Angebot oder eine Paywall. Denn wir sind der Meinung, dass der Zugang zu Informationen frei sein sollte. Um das auch in Zukunft gewährleisten zu können, benötigen wir Ihre Unterstützung; mit einem Abonnement oder einer Spende: woxx.lu/support.
Tagged , , , , , . Bookmark the permalink.

Comments are closed.