All Woch bitt d’woxx Iech an hirem Podcast en Abléck an hir journalistesch Aarbecht a beliicht d’Hannergrënn vun engem Artikel.
D‘Summerlach ass normalerweis eng Zäit, wou Journalist*inne selwer Theme kenne setzen. Leider iwwerrennt d‘Aktualitéit een*t heiansdo awer dach, sou wéi déi zwee Attentater de leschte Weekend an den USA. De Joël Adami huet dat als Ulass geholl, fir e bëssen iwwert Hate Speech um Netz nozedenken, dee ganz séier zu tatsächlecher physescher Gewalt gi kann. Zesumme mam Tessie Jakobs analyséiert hien dofir, wéi Foren wéi 8chan funktionéieren, wat un der Philosophie vun den Incels sou besonnesch geféierlech ass a wat de Lien tëscht Haasskommentaren ënnert Artikelen an sou Massemorde sinn.
Dat zweet Thema dës Woch ass Body Positivity a Fat Acceptance. D‘Tessie Jakobs ass op d‘Spure vum Mouvement gaangen an huet sech ugekuckt, wéi sech d‘Fat Acceptance-Beweegung entwéckelt huet, a wéi dorausser och Body Positivity ginn ass. Dëst ass vill méi breet ugeluecht, wat dozou gefouert huet, datt och vill Leit mat opgespronge sinn, déi am Fong näischt mat Fat Acceptance ze dinn haten – wat esouwäit gaangen ass, datt elo esouguer erëm Leit ausgeschloss ginn, well se ze déck sinn. Ausserdeem kucken d‘Journalist*innen sech un, wéi een de Bléck selwer schoule kann.
De Podcast abonnéieren: mat Apple Podcasts (iTunes) / op Spotify/ mat Android / per RSS.