D’Tessie an d’Isabel hunn den neien Netflix-Film „The Half of It“ gekuckt. Wat si iwwer de Slogan „A diffrent kind of lovestory“ denken, wien e Knaschtert ass a wisou „sans plus“ d’Expressioun vum Podcast ass, gitt dir an der neier Episode vun „Um Canapé mat der woxx“ gewuer.

Bildquelle: Netflix

De Paul verléift sech an „The Half of It“ gläich zweemol. D’Ellie (riets) an d’Aster (lénks) verbënnt gläichzäiteg eng ganz eege Relatioun. „The Half of It“ – ee Film vun der Regisseurin a Scénaristin Alice Wu, deen den 1. Mee 2020 op Netflix verëffentlecht gouf – thematiséiert eng Dräiecksbezéiung tëscht Jugendlecher. Déi éischt Schwäermerei, Reflexiounen iwwer queer an heterosexuell Léift – alles Themen, déi am Film ugeschwat ginn.

D’Tessie an d’Isabel sinn dovunner begeeschtert – an awer och net. Matt gemëschte Gefiller hunn si de Film ugekuckt an sech deelweis an hir eege Jugend zréckversat gefillt. Wat si u Schwammen an enger waarmer Quell an engem Kuss zum Schluss gestéiert huet? Lauschtert eran an de Kultur-Podcast „Um Canapé mat der woxx“.