All Woch bitt d’woxx Iech an hirem Podcast en Abléck an hir journalistesch Aarbecht a beliicht d’Hannergrënn vun engem Artikel.
Zwee Härtefäll sinn dës Woch eist Thema. De Joël Adami an d‘Isabel Spigarelli ënnerhalen sech iwwert de Fall vun zwou Fraen, déi an hiren Heemechtslänner sexuell Gewalt erfuere hunn, sollen zeréck an déi Länner, wou si als éischt Schutz ugefrot hunn. Eng krut awer kee Schutz an der Schwäiz, déi aner soll zeréck an Italien, wou grad eng extrem migratiounsfeindlech Politik gemaach gëtt an net sécher ass, ob si iwwerhaapt een Iwwerdaach wäert hunn.
An dëst grad zu Lëtzebuerg, wou virun e puer Méint eng Initiativ gestart ginn ass, fir géint sexualiséiert Gewalt a Vergewaltegungen als Krichswaff virzegoen. D‘ONG Passerell huet dowéinst den Ausseminister Asselborn hefteg kritiséiert – deen huet zwar reagéiert, mä gesäit keng Chance, Ausnamen ze maachen. D‘ONG hirersäits proposéiert dofir een anere System, fir mat esou Härtefäll ëmgoen ze kënnen. D‘woxx-Journalist*innen diskutéieren, wéi d‘Argumenter vun deenen zwou Säite sinn, wéi d‘Situatioun an de Schwäiz an an Italien ass a wéi een d‘Asylrecht méi human kéint gestalten.
De Podcast abonnéieren: mat Apple Podcasts (iTunes) / mat Android / per RSS.